FERRAMENTAS TIC E EDICIÓN DE AUDIO CON REAPER

Este curso de iniciación a REAPER está especialmente dirixido ao profesorado de conservatorios e escolas de música que desexe incorporar ferramentas de produción musical, gravación e edición de audio á súa práctica docente. Non obstante, tamén está aberto a músicos, estudantes, docentes doutros ámbitos e calquera persoa interesada en iniciarse no mundo da produción musical.

Non se require experiencia previa, xa que o curso está concibido cun enfoque totalmente práctico e progresivo, guiando ao alumnado desde os primeiros pasos na configuración do programa ata a creación de proxectos completos. Ao longo da formación aprenderase a configurar REAPER correctamente, gravar audio con calidade, editar pistas de maneira eficiente, traballar con MIDI para crear melodías e harmonías, aplicar efectos básicos de procesado de audio e exportar proxectos finais de forma profesional.

Ademais, exploraranse distintas ferramentas e funcións que permitirán personalizar o fluxo de traballo, optimizar o rendemento do programa e descubrir recursos prácticos aplicables tanto á creación musical como ao ámbito educativo.

Ao finalizar o curso, o alumnado contará cunha base sólida para desenvolver os seus propios proxectos sonoros e musicais con autonomía empregando REAPER.